माघ १४, गोकर्णेश्वर
विज्ञान विषय अध्ययन गरेर के कस्ता परिस्थिति आइपर्छ र यसलाइ कसरी सहज बनाइ जीवनमा लागु गर्ने भन्ने बारे विद्यार्थीहरुलाई सक्षमता विकास सम्बन्धी एक अभिमुखिकरण कार्यक्रमको आयोजना हिजो विद्यालयको विज्ञान हलमा गरियो ।
त्रि. वि. शिक्षण अस्पतालका भूतपूर्व प्राध्यापक तथा वरिष्ठ चिकित्सक डा.रमेश आचार्य मुख्य वक्ता रहनुभएको यस कार्यक्रमको सभापतित्व विद्यालयका प्रधानाध्यापक गुणराम आचार्यले गर्नुभएको थियो । विद्यालय प्रशासन अधिकृत उद्धव रायामाझी सहित विज्ञान विषय शिक्षकहरु उपस्थित कार्यक्रममा सहायक प्र.अ. डा. दिबाकर भण्डारीले स्वागत मन्तव्य राख्नु भएको थियो । प्र.अ. आचार्यले विषय प्रवेश गराउँदै विद्यार्थीको शैक्षिक उन्नयनका लागि अत्यावश्यक यस्ता नविन र नतिजामुखी कार्यक्रमहरु विद्यालयले नियमित गरिरहने र यसबाट विद्यार्थीले भरपुर लाभ उठाउन सक्ने प्रष्ट पार्नुभयो । मुख्य वक्ता डा. रमेश आचार्यले आफ्नो कार्यानुभव तथा जीवन यात्राका भोगाईबाट प्राप्त अनुभव साट्दै विद्यार्थीहरुसँग अन्तक्रिया गर्नुहुँदै विज्ञान विषय अध्ययन गरेर भावी दिनमा कुनकुन सेवा क्षेत्रमा केकस्ता चुनौती र अवसर आउँछ भन्ने बारे अभिमुखिकरण गर्नुभएको थियो ।
विज्ञान इन्चार्ज मनोज आचार्यको संयोजकत्वमा भएको कार्यक्रममा विज्ञान विषयका ९२ जना विद्यार्थीको सहभागिता रहेको थियो ।
